Sumqayıt Şəhər İcra Hakimiyyətinin təşkilatçılığı ilə yay mövsümündə çimərliklərin fəaliyyətinin təşkili, təhlükəsizliyin təmin olunması və xidmət keyfiyyətinin artırılması ilə bağlı geniş tərkibli görüş keçirilib.
Sumqayit.tv xəbər verir ki, görüşdə aidiyyəti dövlət qurumlarının, hüquq-mühafizə orqanlarının, kommunal xidmət təşkilatlarının nümayəndələri və sahilyanı ərazilərdə fəaliyyət göstərən sahibkarlar iştirak ediblər.
Tədbirdə yay mövsümündə vətəndaşların rahat və təhlükəsiz istirahətinin təmin olunmasının əsas prioritetlərdən biri olduğu bildirilib. Qeyd olunub ki, sahilyanı ərazilərdə abadlıq və təmizlik işləri aparılıb, çimərliklərin infrastrukturu yoxlanılıb və sanitariya vəziyyətinin yaxşılaşdırılması istiqamətində tədbirlər görülüb.
Görüş zamanı xilasetmə xidmətlərinin fəaliyyəti, təcili tibbi yardımın təşkili, ictimai asayişin qorunması, nəqliyyat təminatı və digər məsələlər müzakirə olunub.
Həmçinin bir daha vurğulanıb ki, Sumqayıt çimərliklərinə giriş tam ödənişsizdir. Sahibkarlar yalnız təqdim etdikləri əlavə xidmətlərə görə ödəniş tələb edə bilərlər.
Bildirilib ki, yay mövsümü ərzində çimərliklərdə təhlükəsizlik, təmizlik və xidmət səviyyəsinə nəzarət məqsədilə mütəmadi monitorinqlər aparılacaq.