Bu gün Azərbaycanda Milli Qurtuluş Günü qeyd olunur. Ölkənin müasir tarixində mühüm yer tutan bu gün dövlət müstəqilliyinin qorunması və siyasi sabitliyin bərpası ilə bağlı dönüş nöqtəsi hesab edilir.

1993-cü ilin yayında Azərbaycanda gərgin ictimai-siyasi vəziyyət hökm sürürdü. Ölkədə hakimiyyət böhranı dərinləşmiş, müxtəlif bölgələrdə qarşıdurma təhlükəsi yaranmışdı. Gəncədə yerləşən 709 saylı hərbi hissənin rəhbərliyi mərkəzi hakimiyyətə tabe olmaqdan imtina etmiş, bunun ardınca hadisələr daha da kəskinləşmişdi.

Hökumətin vəziyyəti nəzarətə götürmək cəhdləri nəticə verməmiş, əksinə, qarşıdurmanın miqyası genişlənmişdi. Hərbi qrupların Bakıya doğru hərəkət etməsi və hakimiyyət dəyişikliyi tələbləri ölkəni vətəndaş müharibəsi təhlükəsi ilə üz-üzə qoymuşdu.

Yaranmış böhranlı vəziyyətdə o dövrdə Naxçıvan Muxtar Respublikası Ali Məclisinin sədri olan Heydər Əliyev Bakıya dəvət olunub. O, iyunun 9-da paytaxta gələrək ölkədə sabitliyin bərpası istiqamətində fəaliyyətə başlayıb.

Heydər Əliyev daha sonra vəziyyətin ən gərgin olduğu Gəncə şəhərinə səfər edib, müxtəlif tərəflərlə danışıqlar apararaq qarşıdurmanın dərinləşməsinin qarşısını almağa nail olub. Bu addım ölkədə vətəndaş müharibəsi təhlükəsinin aradan qaldırılmasında mühüm rol oynayıb.

1993-cü il iyunun 15-də Heydər Əliyev Azərbaycan Respublikası Ali Sovetinin sədri seçilib. Həmin tarixdən etibarən ölkənin siyasi həyatında yeni mərhələnin əsası qoyulub.

Azərbaycan tarixində mühüm əhəmiyyət daşıyan 15 İyun sonradan Milli Qurtuluş Günü elan edilib. 1998-ci ildən etibarən bu gün dövlət səviyyəsində bayram kimi qeyd olunur və qeyri-iş günü hesab edilir.

15-06-2026, 11:37 105