Sumqayıt şəhərinin Çerkassi küçəsində, "Qəbələ" restoranının qarşısında yaranan antisanitar vəziyyət sakinlərin narazılığına səbəb olub.

Sumqayit.tv-yə daxil olan müraciətdə bildirilir ki, yol kənarında yerləşən tullantı konteynerlərinin ətrafına yığılan məişət və iri həcmli tullantılar uzun müddətdir daşınmır. Nəticədə ərazi demək olar ki, zibil yığınına çevrilib.

Sakinlərin sözlərinə görə, isti yay günlərində tullantılardan yayılan kəskin üfunət iyi ətrafda yaşayanlar və ərazidən istifadə edənlər üçün ciddi narahatlıq yaradır. Onlar bildirirlər ki, küləkli hava şəraitində qoxu daha geniş əraziyə yayılır.

Şikayətdə o da qeyd olunur ki, tullantıların vaxtında daşınmaması siçovulların və digər zərərvericilərin sayının artmasına səbəb olur. Sakinlər hesab edirlər ki, bu cür antisanitar vəziyyət xüsusilə yay aylarında müxtəlif yoluxucu xəstəliklərin yayılması riskini artırır.

Vətəndaşlar aidiyyəti qurumlardan ərazidə tullantıların operativ şəkildə daşınmasını, mütəmadi təmizliyin təmin edilməsini və problemin qısa zamanda aradan qaldırılmasını tələb edirlər.

Qeyd: Qarşı tərəfin mövqeyini dərc etməyə hazırıq.

26-06-2026, 13:55 86