Sumqayıtda eyni problem yenidən təkrarlanır: Təmizlənən ərazi 4 gün sonra yenidən zibilliyə çevrildi.

Sumqayıt şəhərinin Çerkassi küçəsində, "Qəbələ" restoranının qarşısında yaranmış antisanitar vəziyyətlə bağlı Sumqayit.tv-də 4 gün əvvəl yayımlanan xəbərdən sonra aidiyyəti qurumlar operativ tədbir görərək ərazidəki tullantıları təmizləmişdilər. Lakin problem qısa müddət sonra yenidən əvvəlki vəziyyətinə qayıdıb.

Redaksiyamıza göndərilən son fotolardan görünür ki, ərazidə yerləşən 3 ədəd tullantı konteyneri yenidən dolub, məişət və iri həcmli tullantılar konteynerlərə sığmadığı üçün ətrafa səpələnib. Antisanitar vəziyyət daha da ağırlaşıb. Fotolardan birində ərazidə ölmüş itin olması da vəziyyətin nə qədər təhlükəli həddə çatdığını açıq şəkildə göstərir.

Sakinlərin sözlərinə görə, əsas problem zibil qutularının sayının az olması deyil, tullantıların vaxtında daşınmamasıdır. Nəticədə isti havalarda əraziyə kəskin üfunət iyi yayılır, müxtəlif zərərvericilər çoxalır və bu hal həm ətraf mühit, həm də insanların sağlamlığı üçün ciddi risk yaradır.

Bu vəziyyət göstərir ki, problemin birdəfəlik təmizləmə aksiyası ilə həll edilməsi kifayət deyil. Ərazidə tullantıların müntəzəm qrafik əsasında daşınması, konteynerlərə daimi nəzarətin təmin edilməsi və antisanitar vəziyyətin təkrarlanmaması üçün sistemli tədbirlər görülməlidir.

Ümid edirik ki, aidiyyəti qurumlar məsələni yenidən diqqətdə saxlayacaq, yaranmış vəziyyəti qısa zamanda aradan qaldıracaq və bu problemin təkrar yaşanmaması üçün zəruri addımlar atacaqlar.

Qeyd: Qarşı tərəfin mövqeyini dərc etməyə hazırıq.

30-06-2026, 10:33 134