Sumqayıtın 45-ci məhəlləsində yerləşən 8/77 və 9/77 saylı binaların sakinləri uzun illərdir davam edən kanalizasiya problemi ilə bağlı aidiyyəti qurumlardan kömək istəyirlər.
Sumqayit.tv-yə müraciət edən sakinlərin sözlərinə görə, hər iki binanın zirzəmisi tamamilə kanalizasiya suları ilə dolub. Nəticədə ərazidə kəskin üfunət qoxusu yaranıb, siçovullar və ağcaqanadlar çoxalıb, antisanitar vəziyyət sakinlərin gündəlik həyatını çətinləşdirib.
Sakinlər bildirirlər ki, problem yeni deyil və illərdir davam edir. Onların sözlərinə görə, bir müddət əvvəl problemin aradan qaldırılması istiqamətində müəyyən işlər görülsə də, proses yarımçıq dayandırılıb.
"Biz dəfələrlə Su-Kanal İdarəsinə müraciət etmişik. Qonşuların hamısı bu problemdən əziyyət çəkir. Zirzəmilər kanalizasiya suyu ilə ağzınadək doludur. İydən danışmağa belə dəyməz. Siçovul, ağcaqanad əlindən vəziyyət dözülməz həddə çatıb. Mən özüm də ən azı 10-15 dəfə müraciət etmişəm. Deyilənə görə, hansısa ağac görüləcək işlərə mane olur deyə problem həllini tapmayıb", – deyə sakinlər bildiriblər.
Onların sözlərinə görə, mövcud vəziyyət həm sağlamlıq üçün ciddi risk yaradır, həm də binalarda yaşayan insanların normal yaşayışına mənfi təsir göstərir.
Sakinlər aidiyyəti qurumlardan problemin qısa müddətdə həll olunmasını və zirzəmilərdə yığılan kanalizasiya sularının təmizlənməsini xahiş edirlər.
Qeyd edək ki, Sumqayit.tv məsələ ilə bağlı aidiyyəti qurumun mövqeyini dərc etməyə hazırdır.
30-06-2026, 18:03
90
