Sumqayıtda köhnə yaşayış binalarının sökülməsi və yenidən qurulması istiqamətində layihələrin icrasına başlanılıb.

Sumqayit.tv xəbər verir ki, bu barədə Azərbaycan Qiymətləndiricilər Cəmiyyətinin sədri Vüqar Oruc məlumat verib.

Onun sözlərinə görə, ölkə üzrə həyata keçirilən yenilənmə proqramı çərçivəsində Sumqayıtın 5-ci, 17-ci və 21-ci məhəllələrində söküntü və yenidənqurma layihələrinə start verilib.

Bildirilib ki, köhnə yaşayış binalarının sökülərək yerində yeni yaşayış komplekslərinin inşası əsasən investorlar tərəfindən həyata keçirilir. Hazırda bu istiqamətdə ən genişmiqyaslı işlər Bakının müxtəlif rayonlarında aparılsa da, proqram artıq Sumqayıtı da əhatə edir.

Vüqar Orucun sözlərinə görə, qarşıdakı illərdə yenilənmə proqramı mərhələli şəkildə Azərbaycanın digər şəhər və rayonlarında da davam etdiriləcək. Əsas məqsəd istismar müddətini başa vurmuş və qəzalı vəziyyətdə olan yaşayış binalarının sökülərək müasir yaşayış kompleksləri ilə əvəz edilməsidir.

Qeyd edək ki, Sumqayıtda hansı binaların söküləcəyi, layihələrin icra qrafiki və sakinlərin köçürülmə mexanizmi ilə bağlı hələlik rəsmi açıqlama verilməyib. Sumqayit.tv mövzu ilə bağlı rəsmi məlumatları izləyərək oxuculara təqdim edəcək.

8-07-2026, 18:59 137