Dövlət İmtahan Mərkəzi (DİM) 5 iyul 2026-cı il tarixində keçirilmiş II və III ixtisas qrupları üzrə qəbul imtahanının nəticələrini açıqlayıb.
Sumqayit.tv xəbər verir ki, imtahan nəticələrində Sumqayıt məktəblərinin məzunları xüsusi uğurları ilə diqqət çəkiblər.
Belə ki, II ixtisas qrupu üzrə hər iki mərhələnin cəminə görə 690 bal toplayaraq ən yüksək nəticəni Sumqayıt şəhər 35 nömrəli tam orta məktəbin məzunu Zamin Ramin oğlu Kərimov göstərib. O, qəbul imtahanının birinci mərhələsində 297.5, ikinci mərhələsində isə 392.5 bal toplayıb.
III ixtisas qrupu üzrə isə Sumqayıt şəhər Təbiət Elmləri Təmayüllü Gimnaziyanın məzunu Əli Musa oğlu Məmmədzadə maksimum 400 bal nəticə göstərən abituriyentlər sırasında yer alıb. O, hər iki mərhələnin cəminə görə 689.6 bal toplayaraq III ixtisas qrupu üzrə ən yüksək nəticə əldə edən abituriyent olub.
Qeyd edək ki, II və III ixtisas qrupları üzrə keçirilən imtahanda ümumilikdə 41 min 623 abituriyent iştirak üçün qeydiyyatdan keçib. Onlardan 1182 nəfər imtahana qatılmayıb, 16 nəfərin isə qayda pozuntusuna yol verdiyi üçün nəticələri ləğv edilib.
DİM bildirib ki, nəticələr, cavab kartları və qiymətləndirmə meyarları ilə qurumun rəsmi internet səhifəsində tanış olmaq mümkündür.
Sumqayit.tv kollektivi olaraq yüksək nəticə göstərən sumqayıtlı abituriyentləri təbrik edir, onlara gələcək təhsillərində uğurlar arzulayırıq.
17-07-2026, 18:47
188
