Bir müddət əvvəl Sumqayit.tv olaraq Stansiya Sumqayıt və Dəmiryolunun Yük Həyəti adlanan ərazidə illərdir həllini gözləyən kanalizasiya probleminin aradan qaldırılması istiqamətində mühüm addım atıldığını oxucularımızla bölüşmüşdük. Bu gün yenidən əraziyə baş çəkərək görülən işlərlə yerində tanış oldum.

Müşahidələrim onu deməyə əsas verir ki, işlər yüksək templə davam edir. Ərazidə xüsusi texnikalar fasiləsiz işləyir, kanalizasiya boruları və lyuklar layihəyə uyğun şəkildə quraşdırılır. Görünən odur ki, uzun illər sakinlərin əziyyət çəkdiyi problem artıq həll mərhələsinə qədəm qoyub.

Layihə Sumqayıt Şəhər İcra Hakimiyyətinin başçısı Zakir Fərəcovun nəzarəti altında həyata keçirilir. İşlərin təşkilinə rəhbərlik edən qəsəbə sakini Hafiz Rüstəmov və ərazi üzrə bələdiyyə nümayəndəsi Eldar Əhmədov demək olar ki, günün böyük hissəsini tikinti sahəsində keçirərək işlərin gedişinə nəzarət edirlər. Təşəbbüs qrupunda qəsəbənin hörmətli ağsaqqalları Əhməd Mahmudov, Sabir Məhərrəmov və Zahid Əhmədovun da fəal iştirakı xüsusi diqqət çəkir.

Bu layihəni digərlərindən fərqləndirən əsas cəhət isə insanların nümayiş etdirdiyi birlikdir. Cəmi 14 küçədən ibarət qəsəbədə hər küçə öz nümayəndəsini seçib, operativ əlaqələndirmə üçün ayrıca ünsiyyət qrupları yaradılıb. Nəticədə qısa müddətdə hər evdən 650 manat olmaqla vəsait toplanıb.

Ümumi dəyəri 1 milyon 190 min manat olan layihənin 600 min manatı məhz sakinlərin vəsaiti hesabına maliyyələşdirilib. Qalan hissənin təmin olunmasına isə ərazidə fəaliyyət göstərən bir sıra sənaye müəssisələri dəstək veriblər.

Təəssüf doğuran məqam isə ondan ibarətdir ki, bəzi müəssisələr bu sosial əhəmiyyətli layihəyə qoşulmaqdan yayınıblar. Halbuki, bu ilin əvvəlində ərazinin nisbətən hündür hissəsində yerləşən bəzi müəssisələrin çirkab sularının qəsəbəyə axıdılması nəticəsində ciddi problemlər yaşanmış, zirzəmilər su altında qalmış, dörd yaşayış evində çatlar əmələ gəlmişdi.

Bu gün ərazidə gördüyüm mənzərə bir daha göstərdi ki, böyük problemlərin həlli təkcə dövlətin deyil, cəmiyyətin də həmrəyliyindən keçir. Dövlət qurumlarının nəzarəti, təşəbbüs qrupunun əzmkarlığı, sakinlərin fədakarlığı və sosial məsuliyyət nümayiş etdirən müəssisələrin dəstəyi nəticəsində illərlə həllini gözləyən bir problem artıq tarixə qovuşmaq üzrədir.

Ümid edirəm ki, bu nümunə digər yaşayış məntəqələri üçün də örnək olacaq və sosial məsuliyyət anlayışı daha da güclənəcək.

Müəllif: Vüsal Hacısoy

1-08-2026, 16:34 75