Sumqayıt şəhərinin 13-cü mikrorayonunda yerləşən uşaq parkı ilə bağlı sakinlər narazılıq edirlər.

Sumqayit.tv-yə daxil olan müraciətdə iddia olunur ki, parkdakı uşaqlar üçün nəzərdə tutulmuş yelləncəklər və sürüşkənlər naməlum səbəbdən qıfıl, tros və iplərlə bağlanıb.

Sakinlərin sözlərinə görə, park avadanlıqlarını bir xanım bağlayıb. Onlar iddia edirlər ki, həmin şəxs uşaqların əraziyə daxil olmasına mane olur, parkdan istifadə etməyə icazə vermir və bu səbəbdən tez-tez mübahisələr yaranır.

Redaksiyaya təqdim olunan məlumatlarda həmin şəxsin kimliyi göstərilsə də, Sumqayit.tv etik prinsipləri rəhbər tutaraq onun şəxsiyyətini açıqlamır.

Müraciətdə qeyd olunur ki, hadisə 3 avqust 2026-cı il tarixində baş verib. Sakinlər məsələ ilə bağlı polisə də məlumat verdiklərini bildirirlər.

Vətəndaşlar qeyd edirlər ki, ictimai istifadəyə açıq olan uşaq parkının bu şəkildə məhdudlaşdırılması narahatlıq doğurur və aidiyyəti qurumların məsələyə hüquqi qiymət verməsini gözləyirlər.

Qeyd: Xəbərdə yer alan məlumatlar sakinlərin iddialarına əsaslanır. Sumqayit.tv məsələ ilə bağlı qarşı tərəfin və aidiyyəti dövlət qurumlarının mövqeyini dərc etməyə hazırdır. Rəsmi açıqlama daxil olduğu təqdirdə material yenilənəcək.

4-08-2026, 18:10 81