Sumqayıt şəhərinin Heydər Əliyev prospekti, 2-ci mikrorayon ərazisində yaşayan sakin gecə saatlarında restoranların ətrafında yaranan səs-küydən narazıdır.
Sumqayit.tv-yə müraciət edən sakin bildirir ki, problem uzun müddətdir davam edir. Onun sözlərinə görə, xüsusilə futbol matçları keçirilən günlərdə Nbeer PUB-da müştərilərin yüksək səslə danışması və mübahisələri gecə saatlarında narahatlıq yaradır.
Sakin iddia edir ki, digər tərəfdən Ayasofya restoranı ətrafında kuryerlərin motosikletlərlə səs-küy yaratması, eləcə də əraziyə gələn bəzi şəxslər arasında yüksək səslə mübahisələrin və söyüşlərin olması narahatlıq doğurur.
Onun iddiasına görə, belə hallar əsasən gecə saatlarında baş verir və bəzən 1-2 saat davam edir.
Müraciət müəllifi bildirir ki, yaşadığı bina sözügedən obyektlərdən təxminən 100 metr məsafədə yerləşir və yaranan səs-küy mənzilin daxilində aydın eşidilir.
"Yuxudan səsə oyanıram, yuxum pozulur və yata bilmirəm. Hər gün səhər saat 05:30-da işə gedirəm. Gecə yuxudan oyandıqdan sonra 2-3 saat yata bilmirəm. Əsəblərim pozulur", – sakin bildirib.
Sakin həmçinin qeyd edib ki, 8 avqust 2026-cı il saat 01:16 radələrində restoranlardan birinin qarşısında bir qrup şəxsin mübahisəsi baş verib. Onun sözlərinə görə, təxminən 5-6 gəncin iştirak etdiyi mübahisə yarım saata yaxın davam edib.
Müraciət müəllifi bildirib ki, hadisə ilə bağlı polisə və ya digər aidiyyəti qurumlara indiyədək rəsmi müraciət etməyib. Həmçinin hadisələri təsdiqləyən foto və video görüntülərin olmadığını qeyd edib.
Sakin restoranların fəaliyyətinə qarşı olmadığını, əsas narazılığının gecə saatlarında yaranan səs-küy və asayişlə bağlı olduğunu vurğulayıb.
O, aidiyyəti qurumlardan məsələyə diqqət yetirməyi, gecə saatlarında səs-küy və asayişlə bağlı yaranan halların qarşısının alınmasını istəyir.
Qeyd: Xəbərdə yer alan məlumatlar anonim müraciət müəllifinin iddiaları əsasında hazırlanıb. Sumqayit.tv məsələ ilə bağlı adıçəkilən obyektlərin rəhbərliyinin və aidiyyəti qurumların mövqeyini dərc etməyə hazırdır. Rəsmi açıqlama daxil olduğu halda material yenilənəcək.
10-08-2026, 17:13
66
