Sumqayıtda 33 nömrəli avtobus marşrutunun fəaliyyəti ilə bağlı sakinlərdən növbəti şikayət daxil olub.

Sumqayit.tv xəbər verir ki, sakinlərin sözlərinə görə, xüsusilə bağ massivləri istiqamətində hərəkət edən avtobusların intervalı uzun olur. Nəticədə sərnişinlər dayanacaqlarda uzun müddət gözləməli olurlar.

Sakinlərin əsas narazılığı avtobusların gecikməsi ilə yanaşı, gəldikləri zaman həddindən artıq yüklənməsi ilə bağlıdır. Uzun intervalla hərəkət edən avtobusun dayanacağa çatması zamanı çoxlu sayda sərnişin toplanır və nəqliyyat vasitəsində sıxlıq yaranır.

Sakinlər bildirirlər ki, məsələ ilə bağlı daha əvvəl də aidiyyəti qurumlara müraciətlər edilib və problemin həll olunacağı bildirilib. Lakin onların sözlərinə görə, hazırda vəziyyətdə ciddi dəyişiklik müşahidə olunmur.

Bağ massivlərində yaşayan və şəhər mərkəzinə gündəlik gedib-gələn sakinlər problemin xüsusilə onlar üçün ciddi çətinlik yaratdığını deyirlər. Onların fikrincə, sentyabr ayında məktəb və bağçaların fəaliyyətə başlaması ilə sərnişin sayının artması vəziyyəti daha da ağırlaşdıra bilər.

Sakinlər aidiyyəti qurumlardan 33 nömrəli marşrut üzrə avtobusların hərəkət intervalının azaldılmasını, xəttə əlavə avtobusların cəlb edilməsini və bağ massivləri istiqamətində nəqliyyat probleminin tədris ili başlamazdan əvvəl həll olunmasını xahiş edirlər.

Qeyd edək ki, 33 nömrəli avtobus marşrutunun fəaliyyəti ilə bağlı Sumqayit.tv-yə bundan əvvəl də sakinlər tərəfindən oxşar şikayətlər daxil olub.

Müəllif: Vəsiqə Dadaşova, Sumqayit.tv