Sumqayıt TV-yə şəhərin 14-cü məhəlləsində yaşayan sakinlərdən istilik problemi ilə bağlı şikayət daxil olub.

Sakinlər iddia edirlər ki, 14-cü məhəllədə yaşayış binalarında uzun illərdir dövlət istilik sistemi yoxdur. Onların sözlərinə görə, əvvəllər ərazidə qazanxana fəaliyyət göstərib. Lakin bir neçə il əvvəl qazanxana sökülüb və yerində hündürmərtəbəli binalar tikilib. Hazırda isə qazanxananın yerində heç bir qurğu qalmayıb.

Sakinlər iddia edirlər ki, məsələ ilə bağlı dəfələrlə müraciət olunmasına baxmayaraq, illərdir problem həll edilməyib. Onlara müxtəlif vaxtlarda istilik sisteminin gələcəkdə bərpa ediləcəyi bildirilib.

Onların sözlərinə görə, maddi imkanı olan ailələr öz hesablarına kombi sistemi quraşdırıb. İmkanı olmayan sakinlər isə soyuq aylarda müxtəlif vasitələrlə isinməyə çalışırlar.

Sakinlərdən biri bildirir ki, maddi imkanının məhdud olması səbəbindən kombi quraşdıra bilmir, köhnə kondisionerdən isə elektrik xərcinə görə davamlı istifadə etmək mümkün deyil.

Sakinlər iddia edirlər ki, xüsusilə payız-qış aylarında mənzillərdə ciddi soyuq olur. Müraciət edən sakin ailəsində yeni doğulan uşağın olduğunu və qarşıdan gələn qış mövsümündən narahatlıq keçirdiyini bildirir.

Bundan əlavə, sakinlər 14-cü məhəllədə kanalizasiya problemi olduğunu da iddia edirlər. Onların sözlərinə görə, yağış yağdıqda həyətlərə su yığılır və problem uzun müddət davam edir.

Sakinlər aidiyyəti qurumlardan məsələyə aydınlıq gətirilməsini, istilik sisteminin bərpası ilə bağlı konkret tədbirlər görülməsini və problemin qış mövsümü başlamamış həll olunmasını istəyirlər.

Qeyd: Sakinlərin səsləndirdiyi iddialarla bağlı aidiyyəti qurumların mövqeyini dərc etməyə hazırıq.

17-08-2026, 14:12 82