Sumqayıtın Kotec qəsəbəsi – Yaşıl Dərə istiqamətində fəaliyyət göstərən 10A nömrəli avtobus marşrutu ilə bağlı Sumqayit.tv-ə növbəti sakinlərin şikayəti daxil olub.

Sakinlərin iddiasına görə, marşrut xəttində problem artıq təxminən 6 aydır davam edir. Onlar avtobusların hərəkət intervalının normaya uyğun olmadığını və sərnişinlərin uzun müddət dayanacaqlarda gözləməli qaldığını bildirirlər.

Şikayətçilərin sözlərinə görə, son günlər vəziyyət daha da kəskinləşib. İddia olunur ki, 10A marşrutunda çalışan sürücülərin böyük hissəsi işdən imtina edib. Sakinlər bunu sürücülərin əməkhaqqı və ödəniş sistemi, eləcə də avtobusların hərəkət intervalı ilə bağlı narazılıqları ilə əlaqələndirirlər.

Müraciətdə bildirilir ki, əvvəlki sürücülərin təxminən 80 faizinin işdən imtina etdiyi, onların yerinə yeni sürücülərin cəlb olunduğu iddia edilir. Lakin sakinlərin sözlərinə görə, yeni sürücülərin işlədiyi avtobuslar da bəzən təxminən 40 dəqiqəlik intervalla hərəkət edir.

Hazırda isə sürücülərin bildirdiyinə görə, xətt üzrə cəmi 6 avtobusun reysə buraxıldığı iddia olunur.

Nəticədə sərnişinlər uzun müddət avtobus gözləməli olur və 10A marşrutundan istifadə edən sakinlərin narazılığı artır.

Qeyd edək ki, 10A marşrutu ilə bağlı oxşar şikayət daha əvvəl də gündəmə gəlib. İyunun sonunda Sumqayit.TV-yə müraciət edən Yaşıl Dərə sakinləri avtobusların hərəkət intervalının bəzi hallarda 30 dəqiqəyə qədər uzandığını bildirmişdilər.

Sakinlər aidiyyəti qurumlardan 10A marşrutunda yaranmış vəziyyətin araşdırılmasını, avtobusların real sayının və hərəkət intervalının açıqlanmasını, həmçinin sürücülərin narazılıqlarının səbəblərinə aydınlıq gətirilməsini istəyirlər.

Sumqayit.tv məsələ ilə bağlı Azərbaycan Yerüstü Nəqliyyat Agentliyinin və marşrutun daşıyıcısının mövqeyini dərc etməyə hazırdır.

19-08-2026, 12:55 170