Sumqayıtın 9-cu mikrorayonunda zibil qablarının yerləşdirilməsi sakinlərin narazılığına səbəb olub.
Sumqayit.tv-yə müraciət edən sakinlərin sözlərinə görə, Araz marketin yaxınlığında yerləşən ərazidə iki gündür yeni zibil qabları quraşdırılıb.
İddia olunur ki, zibil qabları marketin avtomobillər üçün nəzərdə tutulan dayanacaq hissəsinə, yolun kənarında yerləşdirilib.
Sakinlər bildirirlər ki, qabların yolun kənarında yerləşdirilməsi nəticəsində tullantılar ətrafa və yolun hərəkət hissəsinə tökülür. Bu isə həm antisanitar vəziyyət yaradır, həm də ərazinin görünüşünə mənfi təsir göstərir.
Şikayətçilər zibil qablarının məhz bu ərazidə hansı əsasla yerləşdirildiyinə aydınlıq gətirilməsini və problemin aradan qaldırılmasını istəyirlər.
Sakinlər hesab edirlər ki, tullantıların toplanması üçün qabların yerləşdirilməsi ilə yanaşı, onların uyğun və təhlükəsiz ərazidə yerləşdirilməsi, vaxtında boşaldılması və ətraf ərazinin təmiz saxlanılması da nəzərə alınmalıdır.
Sumqayit.tv məsələ ilə bağlı aidiyyəti qurumun mövqeyini öyrənməyə hazırdır.