Sumqayit.tv-nin redaksiyasına vətəndaşların şikayəti daxil olub. Belə ki, son illər şəhərin müxtəlif məkanlarında səki problemi insanları narahat edir. Belə ki, piyadalar üçün nəzərdə tutulmuş hissələr tikinti normalarının əksinə olaraq müxtəlif obyektlər və ya tikinti şirkətləri tərəfindən hasarlanır. Belə hallardan biri də Sumqayıtın 10-cu mkr ərazisində müşahidə olunur. Vətəndaşlar ümumi olaraq bunları qeyd edir: "Artıq neçə ildi biz "Göyəzən" şadlıq sarayı tərəfdən Hipermarketə gedən yolda problem yaşayırıq. Faktiki olaraq avtomobil yolu ilə hərəkət edirik. Uşaq var, yaşlı var. Kim zəmanət verir ki, orda qəza olmayacaq. Faktiki olaraq yolu getmək üçün avtomobillərlə eyni yolda addımlayırıq. Maşın dəmirdi, biz isə insanıq. Qəza olanda əsas zərər görən biz olacağıq. Burda bir piyada yolu olmalıdı, ya yox ?! Hələ üstəlik maşınlar yol qırağında saxlayır. Belə olan halda biz daha çox yolun içinə girməli oluruq. Hər hansı qəza olsa, insanlar həlak olsa, bunun məsuliyyəti kimin üzərində qalacaq ?! Gərək uşaqlı- böyüklü faciəvi qəza ola, çoxlu insanlar həyatını itirə ?! Bu problem neçə illərdi mövcudluğunu saxlayır. Amma hələ də tədbir görən yoxdu. Aidiyyatı qurumlardan xahiş edirik bizim yolumuzu bərpa etsinlər. Biz də normal yolumuzu gedək".