Avropa İttifaqı (Aİ) Ukraynaya 500 milyon avro məbləğində əlavə hərbi yardım edəcək.

Xarici KİV xəbər verir ki, bunu Aİ-nin xarici siyasət üzrə nümayəndəsi Josep Borrell Almaniyada keçirilən G7-nin xarici işlər nazirləri çərçivəsindəki toplantıda deyib.

Borrell hərbi dəstəyin tank və artilleriya kimi ağır silahlardan ibarət olacağını bildirib.

Ayrılan məbləğ Aİ-nin Ukraynaya yardımını təxminən 2 milyard avroya çatdıracaq.

Borrell həmçinin, yaxın günlərdə Rusiya neftinə embarqoya dair razılaşmanın əldə oluna biləcəyinə əminliyini ifadə edib.

"Mən əminəm ki, bizim razılaşmamız olacaq. Bu, bizə lazımdı. Biz Rusiyadan neft asılılığından qurtulmalıyıq", - o deyib.

Öz növbəsində Böyük Britaniyanın xarici işlər naziri Liz Truss Ukraynaya daha çox silah tədarük edilməsinə çağırıb.
"Hazırda Ukraynanı daha çox silahla təmin etməklə, sanksiyaları artırmaqla Vladimir Putinə təzyiq göstərməyimiz çox vacibdir”, - deyə Truss nazirlərin görüşü zamanı bildirib.