Sumqayit.tv-nin redaksiyasına vətəndaşların şikayəti daxil olub.  Şikayətdə bildirilir ki, Sumqayıt Olimpiya İdman Kompleksində qanunsuz pul yığılır. Verilən məlumata görə, olimpiya idman növləri ilə məşğul olan idmançılardan 30 manat pul tələb edilir. Azərbaycan Respublikasının Prezidenti İlham Əliyev cənablarının göstərişinə əsasən, olimpiya idman növləri üzrə məşq keçən idmançılardan pul tələb olunmur. 

Sumqayit.tv olaraq məsələ ilə bağlı kompleksin rəhbəri Zeynəb Məmmədyarova ilə əlaqə saxladıq.Lakin zəngimizi açan Zeynəb xanım heç şikayəti dinləmək belə istəmədi: "Siz kimsiniz ki, məndən açıqlama almaq istəyirsiz? Kimin şikayəti varsa, getsin polisə şikayət etsin. İndi hər şikayətə mən cavab verməliyəm ki? Bu şikayətlər son zamanlarda qəsdən mən gəldikdən sonra olur. Mənə qədər iş olmayıb, şikayət də olmayıb. Məndən sonra iş olur deyə, hamı şikayət edir. Bununla bağlı, mənə zəng etmək sizin işiniz deyil. Siz öz işinizi bilmirsinizsə, sağ olun" deyib telefonu üzümüzə qapatdı.

P.S. Hər halda, sualı dinləyib cavab vermək daha yaxşı olardı. Əksinə müxbirə "siz öz işinizi bilmirsiz" demək etik normalara sığmır.