Bakıda Qərbi Azərbaycan İcması tərəfindən “Ermənistandan didərgin salınmış azərbaycanlıların təhlükəsiz şəkildə və ləyaqətlə geri qayıdışını təmin etmək: Qlobal kontekst və ədalətli həll” mövzusunda təşkil edilən beynəlxalq konfrans çərçivəsində tədbirə gələn qonaqlarla İcma üzvləri arasında ikitərəfli görüşlər davam edir.
Sumqayit.tv-in xəbərinə görə, Beynəlxalq İranşünaslıq Mərkəzinin Tədqiqat üzrə direktoru, istefada olan general-mayor Əhməd Əl-Maimoni ilə bir araya gələn Qərbi Azərbaycan İcmasının sədr müavini, Milli Məclisin deputatı Ramil Həsən bildirib ki, təmsil etdiyi icmanın əksər üzvləri kimi o da doğulduğu torpaqlardan uzaq düşüb və 35 ildir ki, yaxınlarının məzarını belə ziyarət edə bilmir.

Sədr müavini bu taleyi yüz minlərlə qərbi azərbaycanlının paylaşdığını vurğulayıb. Əhməd Əl-Maimoni eşitdiklərindən təsirləndiyini bildirərək bunun insanlıq əleyhinə cinayət olduğunu, bu haqsızlığın aradan qaldırılmalı olduğunu vurğulayıb.
Qərbi Azərbaycan İcmasının sədri, Milli Məclisin deputatı Əziz Ələkbərli isə “Əlcəzair-2” Universitetinin professoru Şakib Benhafri ilə görüşüb.
İcma sədri bildirib ki, qərbi azərbaycanlıların öz evlərindən zorla qovulması nəticəsində Ermənistan monoetnik dövlətə çevrilib. O qeyd edib ki, soydaşlarımızın tərk etdiyi yaşayış məntəqələrinin əksəriyyəti bu gün də boş və viranədir, mədəni irsimiz dağıdılıb, məzarlıqlarımız yerlə-yeksan edilib.
Əlcəzairli qonaq baş verən hadisələrin insanlıq tarixində utancverici səhifə olduğunu ifadə edib.
Daha bir görüş İcmanın Qadınlar Şurasının sədri, Milli Məclisin deputatı Məlahət İbrahimqızı ilə italiyalı mədəni irs mütəxəssisi Alessandro Biançi arasında baş tutub.

Məlahət İbrahimqızı bildirib ki, ötən əsrdə baş verən deportasiyalar soydaşlarımızın mədəni irsinə ağır zərbə vurub. Məscidlərimiz, tarixi abidələrimizlə yanaşı, xalçaçılıq, aşıq sənəti, ədəbiyyatımız məhv olma təhlükəsi ilə üz-üzə qalıb. Şura sədri beynəlxalq arenada bu istiqamətlə məşğul olan qurumların bu faciəyə səssiz qalmasının yolverilməz olduğunu vurğulayıb.
Alessandro Biançi mədəni irsə qarşı vandallıq aktlarının yolverilməz olduğunu, dünya birliyinin bu məsələdə həmrəy olmalı olduğunu qeyd edib.