Alimlər mikrobiom balanssızlığının uşaqlarda yayılmış allergiya, ekzema, astma, qida allergiyası ilə əlaqəli olduğunu aşkar ediblər.
Ölkə.Az xarici mediaya istinadla xəbər verir ki, bütün bunların bağırsaq mikrobiomu, həzm sistemində yaşayan bakteriya, göbələk və viruslar kimi mikroorqanizmlər birliyi ilə necə əlaqəli ola biləcəyi müəyyənləşib.

“Nature Communications” jurnalında dərc edilən araşdırmanın nəticələrinin uşaqlarda allergiyanın yayılmasının qarşısını almağa töhfə verə biləcəyi bildirilir. “British Columbia” Universiteti və Kanadadakı Uşaq Xəstəxanasının alimləri bağırsaq mikrobiomunun xüsusiyyətləri və erkən həyat təsirlərinin ümumi allergiyanın inkişafı ilə əlaqəli olduğunu aşkarlayıblar. Allergiyaların özünəməxsus simptomları olsa da, tədqiqatçılar onların körpələrin bağırsaq mikrobiomu ilə əlaqəli ortaq bir mənşəyi paylaşıb-paylaşmadığını öyrənmək istəyiblər.
Tədqiqatda, doğumdan beş yaşına qədər məlumatları təqib edilən 1115 uşağın klinik qiymətləndirmələri araşdırılıb. Bu uşaqların təxminən yarısında heç bir allergiya dəlili tapılmayıb, lakin 592 nəfərə həkim tərəfindən bir və ya bir neçə allergik xəstəlik diaqnozu qoyulub. Üç aylıq və daha sonra bir yaşındakı uşaqların bağırsaq nümunələrini araşdıran tədqiqatçılar, beş yaşına qədər uşaqlarda allergiya ilə əlaqəli bakteriyaların izini tapıblar. Bakterial iz bağırsaq florasının balanssızlığının əlaməti kimi tanınıb. Bu, bağırsağın selikli qişasının zədələnməsinə və bağırsaqda artan iltihab reaksiyasına səbəb olur.
Məqalənin aparıcı müəllifi Kortni Hoskinson qeyd edib ki, adətən vücudumuz bağırsaqlarımızda yaşayan milyonlarla bakteriyaya dözür, çünki bu, sağlamlığımız üçün çox vacibdir: “Bədən buna dözmək üçün immun hüceyrələri arasında güclü maneə yaratmalı və iltihab siqnallarını məhdudlaşdırmalıdır. Bu, həmin immun hüceyrələrini aktivləşdirəcək. Körpələrdə allergiya əmələ gəlməzdən əvvəl bu mexanizmlərdə geniş yayılmış pozulma vəziyyəti aşkarlanıb”.
Pediatriya kafedrasının professoru və tədqiqatın baş müəllifi Stuart Turvey diqqətə çatdırıb ki, balanssızlığa səbəb olan problem körpənin necə doğulduğu, harada yaşadığı və antibiotiklər kimi dərmanlara məruz qalma və digər amillərlə əlaqələndirilə bilər. Antibiotiklər həssas bakteriyaları məhv edə bilsə də, ana südü ilə qidalandırmanın körpənin bağırsağındakı bakteriyaları yenilədiyi və lazımi qidaları təmin etdiyi bilinir: “Bu məlumatlardan görə bilərik ki, həyatın ilk ilində antibiotik istifadəsi kimi amillər daha sonra allergik pozğunluqlara səbəb olur”.
Alimlər bağırsaq florasının balanssızlığını düzəldən müalicələri tapmaq üçün nəticələrdən istifadə olunacağına ümid edirlər.