Ölkənin sahilboyu ərazilərində ətraf mühitin mühafizəsi məqsədilə həyata keçirilən nəzarət tədbirləri genişləndirilib.
Sumqayit.tv xəbər verir ki, müvafiq dövlət qurumları ilə birgə Daxili İşlər Nazirliyinin əməkdaşları tərəfindən Xəzər dənizinin sahilboyu zonalarında ekoloji sabitliyin qorunması istiqamətində profilaktik tədbirlər davam etdirilir.

Son günlərdə Bakı, Sumqayıt, Xaçmaz, Şabran, Siyəzən və Neftçala şəhər və rayonlarında keçirilən tədbirlər zamanı bir sıra qanun pozuntuları aşkarlanıb. Belə ki, məişət tullantılarının müəyyən olunmuş yerlərdən kənara atılması, tullantı sularının ətrafa axıdılması, icazəsiz tikinti işləri və qadağan olunmuş ərazilərdə tütün istifadəsi halları qeydə alınıb.

Tədbirlər nəticəsində 24 nəfər məişət tullantılarını urnalardan kənara atdığına, 5 nəfər isə digər inzibati xəta hallarına görə məsuliyyətə cəlb olunub. Həmin şəxslər barəsində qanunvericiliyə uyğun olaraq inzibati tədbirlər görülüb.

Ekoloji təhlükəsizliyin təmin olunması istiqamətində bu cür nəzarət və maarifləndirmə tədbirləri davam etdiriləcək.