Ürək-damar sistemi xəstəlikləri, şəkərli diabet, nevroloji və digər xroniki sağlamlıq problemləri olan şəxslər isti havalarda günəş şüalarının təsirinə qarşı daha həssas olurlar.

Sumqayit.tv xəbər verir ki, bunu Zakir Quliyev, Azərbaycan Respublikasının Səhiyyə Nazirliyinin mütəxəssis-eksperti, terapevt deyib.

Onun sözlərinə görə, günvurma zamanı bədən hərarəti 40°C və daha yuxarı qalxa bilər. Bu zaman dəri isti, quru və qızarmış olur, nəbz sürətlənir, tənəffüs tezləşir. Ağır hallarda isə diqqət pozğunluğu, davranış dəyişiklikləri, nitq çətinliyi, huşun bulanması, qıcolmalar və hətta huşun itirilməsi müşahidə oluna bilər. Bu əlamətlər təcili tibbi yardım tələb edən ciddi vəziyyətin göstəricisidir.

Zakir Quliyev bildirib ki, xüsusilə günəş şüalarının daha intensiv olduğu 11:00–17:00 saatları arasında açıq havada uzun müddət qalmaq tövsiyə edilmir. Zərurət olmadıqda həmin saatlarda çölə çıxmamaq, açıq havaya isə əsasən səhər saat 11:00-dək və axşam 17:00-dan sonra üstünlük vermək məsləhətdir.

Ekspert əlavə edib ki, isti havalarda kifayət qədər maye qəbul etmək günvurmadan qorunmağın ən vacib şərtlərindən biridir.

1-07-2026, 16:08 65