İcbari tibbi sığorta sistemində elektron xidmətlərin tətbiqi ilə bağlı yeni hüquqi dəyişikliklər hazırlanıb.

Sumqayit.tv xəbər verir ki, məsələ Milli Məclisin Əmək və sosial siyasət komitəsinin onlayn iclasında müzakirə olunan "Tibbi sığorta haqqında" və "Əlilliyi olan şəxslərin hüquqları haqqında" qanunlara dəyişiklik layihəsində öz əksini tapıb.

Layihəyə əsasən, "İcbari tibbi sığorta fondu" anlayışı qanunvericiliyə əlavə edilir və fond dövlət büdcəsindənkənar müstəqil büdcəyə malik məqsədli dövlət maliyyə fondu kimi müəyyənləşdirilir.

Təklif edilən dəyişikliklərə görə, icbari tibbi sığorta ilə bağlı əməliyyatlar xüsusi elektron informasiya sistemi üzərindən həyata keçiriləcək. Ambulator müalicə üçün dərman vasitələri isə yalnız həmin sistemə daxil edilmiş elektron resept əsasında apteklər tərəfindən təqdim olunacaq.

Bundan başqa, icbari tibbi sığorta şəhadətnaməsinin də elektron formada yaradılması nəzərdə tutulur.

Qanun layihəsinə əsasən, bu dəyişikliklər elektron xidmətlərin hüquqi bazasının gücləndirilməsi və rəqəmsal tibbi xidmətlərin tətbiqinin genişləndirilməsi məqsədi daşıyır.

3-07-2026, 12:03 47