“Ermənistan baş naziri birinci Türkiyə ilə münasibətləri normallaşdırıb, sonra Azərbaycanla sülh müqviləsi imzalamaqda maraqlı görünür”.
Sumqayit.tv xəbər verir ki, bunu politoloq Məhəmməd Əsədullazadə deyib.
Ekspert Ermənistan rəhbərliyinin Rusiyaya qarşı siyasətini sərtləşdirdiyini bildirib:
“Nikol Paşinyan KTMT-nin bu il Ermənistanda keçirilməsi planlaşdırılan hərbi təliminə ev sahibliyi etməkdən imtina edib. Həmçinin o, Ermənistandakı Rusiya hərbi bazasını ölkəsinin təhlükəsizliyinə təhdid hesab edib. Bu açıqlaması və bu fonda Rusiyanın Gümrüdəki 102-ci bazası əleyhinə formalaşdırdığı etiraz aksiyaları iki ölkə arasında siyasi böhranı dərinləşdirəcək. Hesab etmək olar ki, Paşinyan Ermənistanda Rusiyaya “yeni cəbhə” açır.

Paşinyanın əsas siyasi kursu Rusiyanı Ermənistandan çıxarmaqdır. Rusiyanın Ukraynadakı hərbi uğursuzluğu Paşinyanın daxildəki mövqelərini gücləndirir. Bu, onu həm də Kremlə qarşı daha sərt qərarlar verməyə ruhlandırır”.

Məhəmməd Əsədullazadənin fikrincə, Ermənistanın Rusiyadan uzaqlaşması Azərbaycanın xeyrinədir:
“Rusiyanın Ermənistandan çıxarılması Azərbaycanla sülh müqviləsinin imzalanmasına gətirib çıxara bilər. Azərbaycanın mövqeləri güclənir, Ermənistanın baş naziri də bunun fərqindədir.
Paşinyanın bugünkü açıqlamalarından məlum oldu ki, Paşinyan Rusiyaya qarşı barışmaz mövqedə dayanıb və onunla mübarizəsini gücləndirməyə hazırdır.
Azərbaycanla sülh müqaviləsinə gəldikdə, Paşinyan buna yaxın perspektivdə getməyəcək. Ermənistan baş naziri birinci Türkiyə ilə münasibətləri normallaşdırıb, sonra Azərbaycanla sülh müqviləsi imzalamaqda maraqlı görünür”.