ABŞ, Aİ və digər demokratik ölkələr Çinin artan iqtisadi, siyasi və maliyyə gücü ilə mübarizə aparmaq üçün ümumi və balanslaşdırılmış strategiya hazırlamalıdırlar.
Bunu Çexiya Prezidenti Petr Pavel bəyan edib.
O, Brüsselə səfəri zamanı Avropa İttifaqı Şurasının sədri Şarl Mişellə Aİ-ABŞ-Çin münasibətlərini müzakirə edib.
“Biz Avropa, Şimali Amerika və digər demokratiyalar arasında heç bir bölücü xətt çəkməməliyik. Lakin Çinin iqtisadi, siyasi və maliyyə gücünü kifayət qədər balanslaşdıracaq ümumi yanaşmalar axtarmalıyıq”, - Pavel vurğulayıb.
Çexiya prezidenti əmin olduğunu bildirib ki, demokratik ölkələr Çinin təkid etdiyi qaydaları qəbul etməməlidir.
“Aİ bunu təkbaşına edə bilməz. Hətta ABŞ uzunmüddətli perspektivdə bunu təkbaşına edə bilməz. Çinə qarşı kifayət qədər iqtisadi, siyasi və uzunmüddətli perspektivdə hətta hərbi tarazlığın yaradılması yolu birgə səylərdən keçir”, - Pavel qeyd edib.