İsrail raket hücumuna cavab olaraq İrana zərbə endirmək planlarından əl çəkmir. Bu barədə yəhudi dövlətinin müdafiə naziri Yoav Qalant çıxış edib.
“İranın hücumu aqressiv olsa da, qeyri-dəqiq idi. Bizim hücumumuz, əksinə, ölümcül, son dərəcə dəqiq və ən əsası, gözlənilməz olacaq. Onlar nə baş verdiyini və necə baş verdiyini anlamayacaqlar. Sadəcə olaraq, nəticələri seyr edəcəklər” , – deyə o bildirib.
İrana ölümcül zərbələr hansı nəticələrə səbəb olar?
Globalinfo.az-a danışan politoloq Elçin Abdullayev deyib ki, İran və İsrail rəsmilərinin bir-birilərinə qarşı ünvanladıqları mesajlara diqqət etsək, onların münasibətlər sisteminin “quyunun dibində” olduğu görünər:

Elçin Abdullayev
“Yəni bu iki ölkə arasında hələ həlli tapılmayan məsələlər var. Bu da tərəflərdən birinin xeyirinə həll olunmalı, yaxud da konstruktiv mövqe sərgilənib, ortaq qərara gəlinməlidir. Lakin İran və İsrail arasındakı proseslərə nəzər salsaq onların ortaq qərar verməsinin mümkün olmadığının da şahidi olarıq. İranın İsrailə atdığı son raketlərə Təl-Əviv mütləq cavab verəcək. Lakin bunun dəqiq nə zaman baş verəcəyini proqnozlaşdırmaq çətindir”.
Politoloqun sözlərinə görə, İsrail bu məsələni özünün beynəlxalq müttəfiqlərindən kənarda həyata keçirməyəcək:
“Məsləhətləşmənin sonunda İrana sarsıdıcı zərbələr vuracaqlar. Nüvə obyektləri, strateji, hərbi bazaların hədəf alınması gözləniləndir. İsrailin əlində kifayət qədər böyük imkanlar var. Bir neçə istiqamətdən zərbə endirilməsi gözləniləndir. Lakin geniş miqyaslı qarşıdurmanın olması inandırıcı deyil”.

//Globalinfo.az