İslamofobiya insanların dini inancına görə onlara qarşı yönəlmiş ayrı-seçkilik və nifrətin təzahürü olmaqla, insan ləyaqəti, bərabərlik və qarşılıqlı anlaşma prinsiplərini sarsıdır.

Bu barədə Xarici İşlər Nazirliyi İslamofobiya ilə Beynəlxalq Mübarizə Günü münasibətilə sosial şəbəkə hesabında paylaşım edib. Bildirilib ki, bu cür qərəzli yanaşmaların cəmiyyətlərdə yeri yoxdur.

Nazirlik qeyd edib ki, bu gün münasibətilə mədəniyyətlər və dinlər arasında qarşılıqlı hörmət, tolerantlıq və dinc yanaşı yaşama prinsiplərinə sadiqlik bir daha təsdiqlənir.

Paylaşımda vurğulanıb ki, İslam dini sülh, mərhəmət, ədalət və həmrəylik dəyərlərinə əsaslanır və onun yanlış təqdim olunması və ya damğalanması qəbuledilməzdir.

XİN-dən bildirilib ki, dözümsüzlüyün bütün formalarına qarşı mübarizə aparmaq inklüziv, dinc və dayanıqlı cəmiyyətlərin qurulması üçün vacib şərtlərdən biridir.

15-03-2026, 19:12 51