Ukrayna Şimali Atlantika Müqavilə Təşkilatına (NATO) Avropa Birliyindən daha tez bir müddətdə üzv olacaq.
Sumqayit.tv Musavat.com “Liqa” portalına istinadən xəbər verir ki, bu barədə xarici işlər naziri Dmitri Kuleba məlumat verib.

Onun sözlərinə görə Ukrayna Alyansın ondan tələb etdiyi islahatları həyata keçirmək yolunda irəliləyir. “Lakin bəzi ölkələr rəsmi Kiyevi təşkilata üzv etməmək üçün islahatları bəhanə edirlər”,-deyə nazir şikayətini dilə gətirib.
“Əlbəttə ki, bizim də bu məsələdə məsuliyyət payımız var. Lakin Qərbdə bəzi güclər on illərlə islahat adı ilə bizi qapının önündə saxlamaq istəyir. Elə həmişə bizə islahatlarla bağlı “azdır, azdır, çox azdır” deyirlər”,-deyə Dmitri Kuleba söyləyib.

Ukrayna rəsmisi bütün bunlara rəğmən ölkəsinin Qərbin hərbi alyansına qəbul ediləcəyinə əminliyini bildirib.
Elə baş nazir Denis Şmıqal da onun dediklərini təsdiqləyərək Ukraynanın uzağı 5-10 ilə Avropa Birliyi və NATO ailəsinin içində olacağını vurğulayıb.

Baş nazirin sözlərinə görə, bunun önündə iki əngəl var. Birincisi, dövlətin Avropa standartlarına çatmaqla bağlı işlərini yekunlaşdırmaması, ikincisi, bir sıra AB ölkələrinin Birliyin genişlənməsinə şübhəli baxmasıdır.