Bilirsiniz ki, faşist Almaniyası SSRİ-dən çox qorxurdu. Hətta 1939-cu ildə Polşanın yarısını alıb, digər yarısını SSRİ-yə buraxmasında bu qorxu mühüm rol oynamışdı. Lakin Polşadan sonra SSRİ qoşunlarının Finlandiyaya girməsi SSRİ-nin möhtəşəm ordusu barədə bütün mifləri alt-üst etdi. 1917-ci ildə müstəqilliyini elan edən Finlandiya ordusu SSRİ ilə müqayisə olunmayacaq qədər zəif idi. Buna baxmayaraq, SSRİ 1939-cu ilin noyabrında Finlandiya hücumu zamanı gözlənilən performansı ortaya qoya bilməmiş, sadəcə Ladoqa gölünü ələ keçirməklə geri çəkilməyə məcbur olmuşdu. 1940-cı ilin martında başa çatan bu müharibədən sonra Hitler Polşanın yarısını SSRİ-yə buraxmasının peşmançılığını yaşamış və 1 ildən sonra ona hücum etmişdi. Rus qışı və İngiltərə başda olmaqla bir sıra ölkələrin texnika yardımları sayəsində faşist hücumunun qarşısını alan SSRİ II Dünya Müharibəsində qələbə qazana bilmişdi.

Bu gün Ukraynada da ciddi itkilər verən Rusiyanın hərbi qüdrəti barədə yaratdığı mif qırılır. Artıq ABŞ və digər NATO ölkələri Baltik və Norveç dənizinə öz güclü gəmilərini göndərir. NATO-nun Norveçdə keçirməyi planlaşdırdığı hərbi təlimin adı da maraqlıdır: “Soyuq Cavab – 2022”. Adından da bəlli olduğu kimi, NATO qüvvələri bu təlimdə Rusiyaya necə cavab verəcəklərini məşq etməyi planlaşdırırlar. Bu açıq-aşkar Rusiyaya təhdiddir və Moskvanın ona necə reaksiya verəcəyi maraq doğurur.

Heydər Oğuz