Bugün daha iki şəhidimizin anım günü keçirilib. Sumqayit.tv xəbər verir ki, şəhidlərimiz Əliyev Emil Əziz oğlu və Əzizov Teymur Əli oğlunun anım mərasimi keçirilib. Şəhidimiz Əliyev Emilin anım günündə şəhidin ailəsi, yaxınları, qohumları, İcra hakimiyyətinin nümayəndələri, Sumqayıt şəhər Ucuz marketlər şəbəkəsinin kollektivi, şəhidin valideynlərinin iş kollektivi, şəhidlərin əsgər yoldaşları, qazilər və şəhid ailələri iştirak edib. Digər igidimiz Əzizov Teymurun anım gününə isə şəhidin ailəsi, yaxınları, qohumlar, İcra hakimiyyəti nümayəndələri və şəhid ailələri qatılıb.

Emil Əliyev 1993-cü il avqustun 1-i Sumqayıt şəhərində anadan olub. O, ən son Sumqayıt şəhəri 22-ci məhəllədə yerləşən Ən Ucuz Göyçay marketdə müdir müavini vəzifəsində çalışıb. Şəhidimiz 2020-ci il, sentyabrın 21-i Səfərbərlik tərəfindən könüllü hərbi xidmətə çağrılıb. 27 sentyabr 2020-ci il tarixində isə, İkinci Qarabağ Müharibəsinin iştrakçısı olub. Müxtəlif istiqamətlərdə döyüşlərə qatılan Emil Əliyev, ən son 6 oktyabr 2020-ci il tarixində Füzuli rayonu uğrunda gedən döyüşlərdə qəhramanlıq göstərmiş və şəhidlik zirvəsinə ucalmışdır.

Teymur Əzizov 1987-ci il iyunun 22-də Sumqayıt şəhərində anadan olub. Azərbaycan Ordusunun leytenantı olan Teymur Əzizov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə savaşıb. Teymur Əzizov oktyabrın 6-da Füzuli döyüşləri zamanı şəhid olub. 
Ruhunuz şad olsun, Azərbaycan oğulları!