Bugün Vətən müharibəsinin şəhidi Əbil Qadir oğlu Cəbizadənin anım mərasimi keçirilib.
Sumqayit.tv xəbər verir ki, mərasim şəhidimizin məzarının Şəhidlər xiyabanında ziyarət olunması ilə başlayıb, daha sonra isə şəhidimizin yaşadığı mərasim evində davam edib. Şəhidimizin anım günündə ailəsini ilə yanaşı, təhsil aldığı məktəbin müəllim və şagird heyyəti, Sumqayıt şəhər İcra Hakimiyyətin nümayəndələri, şəhidimizin sinif yoldaşları və digər şəhid ailələri iştirak edib. 
Qeyd edək ki, Əbil Cəbizadə 26 fevral 1993-cü ildə Sumqayıt şəhərində dünyaya göz açmışdır.  2000-ci ildə Corat qəsəbəsində yerləşən 7 nömrəli tam orta məktəbin birinci sinfinə daxil olmuşdur. 2011-ci ildə əla qiymətlərlə məktəbi bitirən Əbil həmin ildə də Azərbaycan Dövlət İqtisad Universitetinin Texnologiya və Dizayn fakültəsinə daxil olmuşdur. O Universiteti bitirdikdən sonra hərbi xidmətə yollanmışdır. Silahla mükəmməl davranışına görə baş atıcı vəzifəsinə təyin olunmuşdur. Bir əsgər olraq Əbil Aprel döyüşlərin də iştirak etmiş, döyüş tapşırıqlarını böyük uğurla yerinə yetirmişdir. Bu döyüşlərdə göstərdiyi qəhrəmanlığa görə O, dəfələrlə fəxri fərmanlarla və təşəkkürnamələrlə təltif edilmişdir.  2016-cı ilin oktyabr ayında hərbi xidmətini başa vurmub evə qayıtmışdı.
Əbil Cəbizadə 2020-ci ilin 21 sentyabrında "Hərbi vəzifə və hərbi xidmət haqqında" və "Səfərbərlik hazırlığı və səfərbərlik haqqında" Azərbaycan Respublikasının Qanununa müvafiq olaraq təlim və məşq toplantısına çağırılmışdır.
Əsgər  Əbil Cəbizadə 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak etmişdir. Cəbrayılın və Füzulinin azadlığı uğrunda gedən döyüşlərdə iştirak edib. Xudafərin körpüsünün azad olunmasında böyük şücaət göstərmişdir. Əbil Cəbizadə 14 oktyabr 2020-ci ildə Xocəvənd rayonunun Zoğalbulaq kəndi istiqamətində gedən döyüşlərdə döyüş tapşırığını yerinə yetirərkən həlak olmuşdur.
Azərbaycan prezidenti İlham Əliyevin 15.12.2020-ci il tarixli Sərəncamına əsasən Əbil Cəbizadə ölümündən sonra  "Vətən Uğrunda" medalı, eyni zamnda Cəbrayıl və Füzulinin  işğaldan azad edilməsinə görə medallarla təltif olunub.
Ruhun şad olsun şəhidim!

Müəllif: Vəsiqə Dadaşova