Bu gün (R.e.d-dünən) 27 sentyabr 2020-ci ildə başlayan Vətən müharibəsi zamanı şəhid olan Azərbaycan Silahlı Qüvvələrinin əsgəri Məmmədov Novruz İnqilab oğlunun anım mərasimi keçirilib. Sumqayit.tv xəbər verir ki, şəhidimiz Məmmədov Novruzun anım mərasimi Şəhidlər Xiyabanında məzarını ziyarət edilərək başlanıb. Sonra isə tədbir mərasim evlərinin birində ehsan süfrəsi verilərək davam edib. Məclisdə şəhidlərimizin xatirəsi bir dəqiqəlik sükutla yad edilib. Azərbaycan Respublikasının Dövlət Himni ifa olunub və Quran oxunub, həmçinin tədbirdə vətənpərvər ruhlu şeirlər səsləndirilib. Məclisdə Sumqayıt şəhər 6 saylı tam orta məktəbinin, İstedad liseyinin, TET gimnaziyanın sinifləri, hüquqşunas Ədalət Əroğlu, şairə, jurnalist Leyla Novruzova, müharibə veteranları, qazilər və şəhid ailələri iştirak ediblər. Qeyd edək ki, Novruz Məmmədov 20.03.1991-ci ildə Sumqayıt şəhərində İnqilab Məmmədov və Şəfiqə Məmmədovaların ailəsində anadan olmuşdur. Sumqayıt şəhər Hacı Zeynalabdin Tağıyev qəsəbə 6 saylı tam orta məktəbdə təhsil almışdır. Novruz Məmmədov bir müddət Səfərbərlik və Hərbi Xidmətə Çağırış üzrə Dövlət Xidmətinin Sumqayıt şəhər Hərbi Komissarlığı tərəfindən müddətli həqiqi hərbi xidmətə çağırılmışdır. Novruz Məmmədov müddətdən artıq hərbi qulluqçu-sürücü olaraq xidmətinə davam edib. Azərbaycan Ordusunun əsgəri olan Novruz Məmmədov 27.09.2020-ci il tarixidən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində kəşfiyyatçı və snayper olaraq iştirak etmişdir. Füzulinin azadlığı uğrunda gedən döyüşlərdə vuruşmuşdur. Novruz Məmmədov 24.10.2020-ci ildə Füzuli rayonu istiqamətində döyüş tapşırığının yerinə yetirərkən qəhrəmancasına həlak olmuşdur. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamına əsasən Novruz Məmmədov ölümündən sonra "Vətən uğrunda", "Laçının azad olunmasına görə", "Xocavəndin azad olunmasına görə" və "Füzulinin azad olunmaslna görə" medalları ilə təltif edilib. Allah ruhunu şad etsin, Qəhrəman!
26-10-2022, 23:11
427
