Bu gün (red-dünən) 27.09.2020-ci il tarixində başlayan Vətən müharibəsi zamanı şəhid olan Azərbaycan Silahlı Qüvvələrinin əsgəri Quliyev Teymur Zamin oğlunun şəhadətə ucaldığı gündür. 
Sumqayit.tv xəbər verir ki, şəhidimiz Quliyev Teymurun anım mərasimi Novxanı qəsəbəsində yerləşən  qəbirstanlıqdakı məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Məclisdə Ceyranbatan qəsəbəsinin peşə liseyinin müəllim kollektivi və şagirdləri, Saray qəsəbəsinin 1 nömrəli, 2 nömrəli və 3 nömrəli məktəbinin müəllim və şagird kollektivi və valideynləri, Novxanı bələdiyyəsi və icra nümayəndəsi, Saray bələdiyyəsi və icra nümayəndəsi, Abşeron rayonun icra hakimiyyəti Abidin Fərzəliyev, qohumları və şəhid ailələri iştirak ediblər.

Xatırladaq ki, Teymur Quliyev 29.10.2001-i ildə Bakı şəhərində Zamin Quliyev və Fəridə Quliyevanın ailəsində anadan olmuşdur. Abşeron rayonunun Hökməli qəsəbəsində məskunlaşmışdır. 2007-2012-ci illərdə Abşeron rayon Hökməli qəsəbə tam orta məktəbdə, 2014-2015-ci illərdə Abşeron rayon Saray qəsəbə 1 nömrəli tam orta məktəbdə təhsil almışdır. 2015-2020-ci illərdə Abşeron rayon Ceyranbatan qəsəbə 147 saylı Texniki Peşə Məktəbində motorçu ixtisasına yiyələnmişdir.
Teymur Quliyev 2020-ci ilin iyul ayında Səfərbərlik və Hərbi Xidmətə Çağırış üzrə Dövlət Xidmətinin Abşeron rayon üzrə Hərbi Komissarlığı tərəfindən hərbi xidmətə çağırılmışdır. İlk olaraq Ağcabədidə, sentyabrdan Füzulidə yerləşən "N" saylı hərbi hissədə xidmət etmişdir.

Azərbaycan Ordusunun əsgəri olan Teymur Quliyevv 27.09.2020-ci il tarixindən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak etmişdir. Qubadlının, Zəngilanın və Füzulinin azadlığı uğrunda gedən döyüşlərdə vuruşmuşdur. Teymur Quliyev 24 oktyabr 2020-ci ildə Füzuli rayonu istiqamətində döyüş tapşırığının yerinə yetirilməsi zamanı yaralı hərbçiləri xilas edərkən şəhidlik məqamına ucalıb. Abşeron rayonunda dəfn olunub. 
Azərbaycan Prezidenti İlham Əliyevin Sərəncamına əsasən Quliyev Teymur ölümündən sonra "Vətən uğrunda", “Xocavəndin azad olunmasına görə”, “Füzulinin azad olunmasına görə”, və “Cəsur döyüşçü" medalları ilə təltif olunub.
Ruhun şad olsun, Vətənimizin mərd oğlu!

Müxbir:Vəsiqə DADAŞOVA