Bu gün (r.e.d.-dünən) 27.09.2020-ci ildə başlayan Vətən müharibəsi zamanı şəhid olan Azərbaycanın Daxili İşlər Nazirliyinin Daxili Qoşunlarının giziri İsgəndərov Emil Vaqif oğlunun şəhadətə ucaldığı gündür.
Sumqayit.tv xəbər verir ki, şəhidimizin məclisi şəhərimizin mərasim evlərinin birində keçirilib. Anım mərasimi şəhidlərimizin ruhuna 1 dəqiqəlik sükutla və Azərbaycan Respublikasının himni ilə açılıb. Tədbirdə İcra Hakimiyyətinin nümyəndələri, Quba Daxili Qoşunların hərbçiləri və qaziləri, Hacıqabul Daxili Qoşunların hərbçiləri və qaziləri, Corat Məscidinin axundları Hacı Rauf Məhərrəmov və Hacı Sahib Məmmədov, post patrul işçiləri, qohumlar və şəhid ailələri iştirak ediblər. 
Qeyd edək ki, Emil İsgəndərov 05.09.1990-cı ildə Sumqayıt şəhərində anadan olub.
Emil İsgəndərov 2008–2010-cu illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2011-ci ildən isə DİN Daxili Qoşunların müddətdən artıq həqiqi hərbi xidmət qulluqçusu idi.
Azərbaycanın Daxili İşlər Nazirliyinin Daxili Qoşunlarının giziri olan Emil İsgəndərov 27.09.2020-ci il tarixində Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Füzulinin və Şuşanın azadlığı uğrunda gedən döyüşlərdə savaşıb. Emil İsgəndərov noyabrın 7-də Şuşa döyüşləri zamanı şəhid olub.
Azərbaycan Prezidenti İlham Əliyevin Sərəncamına əsasən Emil İsgəndərov ölümündən sonra "Vətən uğrunda", "Şuşanın azad olunmasına görə" medalları ilə təltif edilib.
Allah ruhunu şad etsin, Qəhrəman! 

Müxbir: Vəsiqə DADAŞOVA