Təəssüf ki heç bir müharibə nə itkisiz, nə qansız olmur. 30 ilə yaxındır mənfur düşmənlərin tapdağı altında qalan torpaqlarımız 44 gün müddətində öz canı bahasına vuruşan oğullar sayəsində geri qayıtdı. Həmin o oğullardan biri də Sumqayıt şəhidi Kərbəlayi Əliyev Sərxan İslam oğludur. Bayrağa bükülüb özünə şəhidlik arzulayan şəhidimiz. 
Vaxtı ikən partalarında əyləşdiyi, uşaqlığını keçirdiyi təhsil ocağında bu gün onsuz "Sərxanlı Zəfər Yolu" adlı tədbir keçirildi. 
Tədbirdə vətənpərvər ruhlu mahnılar ifa olunub, şeirlər səsləndirilib. Liseyin direktoru Qönçə Səttarova şagirdlərə şəhidlərimizi unutmamağı, hər zaman onları yad etməklərini vurğulayıb, həmçinin şəhidimizin müəllimləri və sinif yoldaşlarıda onunla bağlı xatirələrini bölüşüblər. Sonda Qəhrəmanımız Sərxanın valideynləri Esmira xanım və atası İslam bəy tədbir  təşkilatçılarına və iştirakçılarına, körpə fidanlara öz təşəkkürlərini bildirdilər. Vələcəkdəki təhsil həyatlarında onlara uğurlar diləyiblər və öz övladları ilə qürur duyduqlarını qeyd ediblər. Bunu da qeyd edək ki, şəhidimiz Sərxanın böyük qardaşı İlham Əliyev də könüllü cəbhəyə yollanıb, torpaqlarımızın azadlığı uğrunda vuruşub və qazidir. 
Nə qədər ki insanlar bu qəhrəmanlarımızı xatırlayacaqlar, o qədər də şəhidlərimiz var olacaq və yaşayacaqlar, çünki şəhidlər unudulanda ölürlər. Biz rahat zəfər bayramımızı qeyd edək deyə, neçə ananın balasız, övladlarin isə atasız qaldığını unutmayın, unutdurmayın! Sonda yazını Sərxanın sözləri ilə yekunlaşdırmaq istəyirik: "Allahu Təala deyir ki, müvəqqəti həyatı daimi həyata dəyişməyin, əsas axirətimiz gözəl olsun..."
Qeyd edək ki, Əliyev Sərxan İslam oğlu 16.01.1998-ci ildə Sumqayıt şəhərində dünyaya gəlib. 2005-ci ildə "Təfəkkür" liseyinin 1-ci sinifinə qədəmlərini qoyub. Sərxan Əliyev Azərbaycan Respublikasının ərazi bütövlüyü uğrunda 27.09.2020-ci il tarixdən başlayan Vətən müharibəsi zamanı könüllü olaraq döyüşlərə qatılıb və torpaqlarımızın işğaldan azad olunmasında igidlik göstərərək Füzuli istiqamətində gedən döyüşlərdə qəhrəmancasına şəhid olub. 
Ruhun şad olsun, Vətənimizin İgid oğlu!

Jurnalist: Vəsiqə DADAŞOVA