Şəhər prokurorluğu Corat qəsəbəsində baş verən qətl barədə məlumat yayıb.
Sumqayit.tv şəhər prokurorluğunun məlumatina istinadən  bildirilir ki,  dekabrın 17-də, saat 14 radələrində Sumqayıt şəhərinin Corat qəsəbəsi ərazisində 1989-cu il təvəllüdlü Cavid Şirməmmədovun aldığı bıçaq xəsarətləri səbəbindən ölməsi barədə müraciət daxil olub.
Faktla bağlı Sumqayıt şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
Hadisəni törədən şəxsin müəyyən edilərək istintaqa cəlb olunması istiqamətində əməliyyat-axtarış tədbirləri davam etdirilir.
Hazırda iş üzrə istintaq davam edir.
APA-nın yerli bürosunun əldə etdiyi məlumata görə, hadisə qəsəbənin Səttar Əliyev küçəsində baş verib.
Qətlə yetirilən və hadisəni törədən şəxslər qonşu olublar. Qətli törədənin Azər adlı şəxs olduğu bildirilir.
Hər iki şəxsin narkotikə görə əvvəllər məhkum olunduğu deyilir.