Sumqayit.tv bildirir ki, Demokrat.az-ın əldə etdiyi məlumata görə, hadisə Sumqayıt şəhəri, 1-ci mikrorayon istiqamətində Göyərçin parkı ərazisində yerləşən "Star Rooms'' restoranının yaxınlığında baş verib. 

Azər orada tanışı Ruhidi döyərək ona müxtəlif dərəcəli bədən xəsarəti yetirib.

İstintaq orqanı tərəfindən Azərin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Azər ona elan  olunmuş ittiham üzrə özünü təqsirli bilib. 

O bildirib ki, Ruhid ilə təxminən 10 il əvvəl tanıyıb: 

“Özüm həmin vaxt avtobus sürmüşəm, Rahid də mənimlə birlikdə işinə gedib-gəlib. Həmin vaxtdan da onunla  münasibətimiz yarandı”. 

Təqsirləndirilən şəxs qeyd edib ki, hadisə günü, saat 23.00-da Göyərçin parkı ərazisində gəzdiyi zaman "Star Rooms" restoranının yaxınlığında Rahidi görüb: 

“Onunla söhbət etməyə başladım. Söhbət zamanı da Ruhidlə tanış olduğum müddətdə almış olduğu qaz sobasına görə borclu qalmış olduğu 20 manatı tələb etdim. Rahid də hazırda maddi imkanının olmadığını, imkanı olduğu zaman mənə olan 20 manat borcunu ödəyəcəyini dedi. Lakin bir neçə ildir ki, onu görmədiyimi, buna görə də pulumu indi istədiyimi bildirdim. Buna görə də Rahid əsəbləşdi, yenə imkanının olmadığını bildirərək üvanıma nalayiq ifadə bildirdi. Bundan sonra Rahidin üzərinə getdim. Həmin vaxt Rahidin sol göz nahiyyəsinə bir dəfə yumruqla zərbə vurdum. Rahid də barəmdə polisə müraciət edəcəyini dedi”. 

Bu cinayət işinə Sumqayıt şəhər Məhkəməsində baxılıb. 

Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. 

Bu səbəbdən məhkəmə Azərin barəsində olan cinayət təqibinə xitam verib. 

O, cinayət məsuliyyətindən azad edilib.