Fövqəladə Hallar Nazirliyi Sumqayıt Regional Mərkəzinin əməkdaşları üçün “Heydər Əliyev İli” çərçivəsində Sumqayıt şəhər Səid Rüstəmov adına 3 nömrəli Uşaq İncəsənət Məktəbinə ekskursiya təşkil olunub.
FHN-dən Sumqayit.tv-yə verilən məlumata görə, Sumqayıt Regional Mərkəzi, Abşeron-Xızı Regional Mədəniyyət İdarəsinin əməkdaşları və Uşaq İncəsənət Məktəbinin kollektivinin iştirak etdiyi tədbirdə, əvvəlcə məktəbin foyesində ulu öndər Heydər Əliyevə həsr olunmuş rəsm sərgisinə baxış keçirilib.

Məktəbin akt zalında davam etdirilən tədbirdə Azərbaycan Respublikasının Dövlət Himni səsləndirilib, ümummilli liderimiz Heydər Əliyevin və ölkəmizin müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Sonra ulu öndər Heydər Əliyevin xalqımız qarşısındakı tarixi xidmətlərinə həsr edilmiş videoçarx nümayiş olunub.
Daha sonra şagirdlərin ifasında ədəbi-bədii kompozisiya təqdim olunub, Ulu Öndərə həsr olunan şeirlər səsləndirilib, musiqilər ifa edilib.
Sonda Sumqayıt şəhər Səid Rüstəmov adına 3 nömrəli Uşaq İncəsənət Məktəbinin hazırladığı “Qarabağ Azərbaycandır” adlı musiqili klip nümayiş etdirilib.




APA