Azərbaycan Premyer Liqasının 31-ci turunda "Sumqayıt" "Turan Tovuz"a böyük hesabla qalib gəlib - 4:1.

Avrokuboklara vəsiqə uğrunda mübarizə aparan komandaların dueli maraqla gözlənilirdi. Matçdan öncə oyun ətrafında böyük ajiotaj yaranmışdı. Komandaların çempionatda dördlük üçün iddia etməsi oyunu daha maraqlı etmişdi. Eyni zamanda, sabiq "Sumqayıt"lı Ayxan Abbasov indi "Turan Tovuz"un sükanı arxasına keçmiş komandası ilə üz-üzə idi.

Görüşə meydan sahibləri daha aktiv başladı. İlk 10 dəqiqədə 1-2 qol epizodu yaradan tovuzlular əks-hücumda cəzalandı. Şəhriyar Əliyev "Sumqayıt" hücumunun qarşısını almaq istəyərkən topu qapısına göndərdi. Fasiləyə kimi bir qol daha vuran "Sumqayıt" böyük üstünlük yaxaladı.

İkinci hissədə daha aqressiv və aktiv olan tərəf meydan sahibləri idi. Hesabda geri olan tovuzlular azı bir xal qazanmaqçün çalışsalar da, alınmadı. Xüsusilə, "Sumqayıt"ın qapıçısı Mehdi Cənnətovun etibarlı oyunu "kimyaçılar"ın qələbəsində böyük pay sahibi oldu. "Turan Tovuz" çoxsaylı hücumlarına baxmayaraq, təsəlli qoluyla kifayətləndi.

"Sumqayıt" Tovuz səfərində mövsümün ən yaxşı oyunlarından birini keçirdi. Artıq turnir cədvəlində ikinci sıraya yüksələn "kimyaçılar" avrokuboklar yolunda böyük addım atdı. "Turan Tovuz"u beş xal üstələyən "Sumqayıt" indi digər komandaların xal itirməsini gözləyəcək.

Tovuz təmsilçisinin şansları hələ davam edir. Uğurlu seriyadan sonra evdə "Sumqayıt"a məğlubiyyət gözlənilməz oldu. Buna baxmayaraq, "Turan Tovuz"un dördlük mübarizəsi hələ bitməyib. Son beş oyun bu baxımdan daha kritik olacaq. Komandaların xalları bir-birinə yaxındır və çox xal itirən avrokubok zonasının kənarında qalacaq.