Azərbaycan Silahlı Qüvvələrinin baş leytenantı olan Cavid Mirzəyev 14 noyabr 1994-cü ildə Sumqayıt şəhərində anadan olub.
Sumqayit.tv xəbər verir ki, o, Cəmşid Naxçıvanski adına Hərbi Liseydən məzun olduqdan sonra Heydər Əliyev adına Azərbaycan Ali Hərbi Məktəbinə daxil olub. Lakin şəxsi səbəblərdən təhsilini yarımçıq qoymaq məcburiyyətində qalıb. Bir müddət sonra mülki universitetlərdən birində ali təhsil almağa başlayıb. Təhsilini bitirdikdən sonra əsgərliyə gedən Cavid zabit olmaq arzusunu həyata keçirmək üçün kurslara yazılıb və "leytenant" rütbəsi alaraq xidmətini davam etdirib. 44 günlük Vətən müharibəsində könüllü olaraq iştirak edərək Füzuli-Xocavənd istiqamətində şücaət göstərib, bir neçə medalla təltif edilib. Baş leytenant Cavid Mirzəyev 2023-cü ilin 19 sentyabrında Azərbaycan Ordusu tərəfindən başladılan lokal xarakterli antiterror tədbirləri zamanı döyüş tapşırığını yerinə yetirərkən qəhrəmancasına şəhid olub.
Ruhu şad olsun!