“STP Global Cable” xarici valyuta vəsaitlərini ölkəyə niyə geri qaytarmayıb?
“STP Global Cable” MMC yenidən xarici valyuta vəsaitlərini xaricdən qaytarmadığı üçün cərimələnib. İqtisadiyyat.az-ın əldə etdiyi məlumata görə, müvafiq qurum tərəfindən şirkət barəsində İnzibati Xətalar Məcəlləsinin 483-cü (Xarici valyuta vəsaitlərinin xaricdən qaytarılmaması) maddəsinə əsasən cərimə protokolu tərtib edilib. Daha sonra protokol baxılması üçün Sumqayıt Şəhər Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb. Hakim Samir İsmayılovun sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib. Xatırladaq ki, xarici valyuta vəsaitlərinin xaricdən qaytarılmamasına görə inzibati xətanın bilavasitə obyekti olan xarici valyutanın dəyərinin 30 faizindən 50 faizinədək məbləğdə cərimə edilir. Şirkət daha əvvəl eyni inzibati xəta törətdiyinə görə cərimələnib. Qeyd edək ki, STP Global Cable MMC regionda kabel və elektrik avadanlığı məhsulları istehsal edən ən iri şirkətlərdən biridir. MMC STP Şirkətlər Qrupunun tərkibində fəaliyyət göstərir. STP Global Cable MMC-də üç böyük zavod var. Kabel zavodu, Elektrik Avadanlıqları Zavodu və İsti Sinkləmə Zavodu.
15-11-2024, 13:37
200
