Ali Məhkəmədə qəsdən sağlamlığa ağır zərər vurmada təqsirləndirilən Mahir Babşovun (şərti) barəsindəki hökmdən verilən kassasiya şikayəti üzrə məhkəmə iclası başa çatıb.

 
Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.
 
Qərara əsasən, kassasiya şikayəti qismən təmin edilib, Sumqayıt Apellyasiya Məhkəməsinin çıxardığı qərar dəyişdirilib. Məhkum təqsirli bilindiyi Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə təyin edilmiş 3 il 6 ay müddətinə azadlıqdan məhrumetmə cəzası 3 ilə endirilib.
 
İttihama görə, hadisə 11 iyul 2023-cü il tarixdə, saat 17:00-da Abşeron rayonu, Mehdiabad qəsəbəsi, M.F.Axundov küçəsində qeydə alınıb.
 
Belə ki, Mahir Babşovun tanışı, zərərçəkmiş Bayram Balayevin (şərti) ondan iki gün müddətinə qaytarmaq şərti ilə 100 manat pul alıb. Lakin zərərçəkmiş həmin pulu iki günə geri qaytara bilməyib. Buna görə onların arasında mübahisə düşüb. Nəticədə Mahir mətbəx bıçağı ilə zərərçəkmiş şəxsin sinə nahiyəsinə qəsdən bir dəfə vuraraq xəsarət yetirib.
 
Hadisədən sonra Mahir Babşov saxlanılaraq cinayət məsuliyyətinə cəlb edilib.