Sumqayıt Apellyasiya Məhkəməsində qəsdən adam öldürməkdə və xuliqanlıqda təqsirləndirilən Əlipaşa Məmmədovun (soyadı şərti) barəsində çıxarılmış birinci instansiya hökmündən verilən apellyasiya şikayətinə baxılıb.
Sumqayit.tv Pravda.az-a istinadən məlumat verir ki, hakim Elman Əhmədovun sədrliyi ilə keçirilən iclasda qərar elan olunub. Məhkəmə kollegiyası apellyasiya şikayətini əsassız hesab edərək, Sumqayıt Ağır Cinayətlər Məhkəməsinin çıxardığı hökmü qüvvədə saxlayıb.
İttihama görə, hadisə 19 yanvar 2024-cü il, saat 23 radələrində Xaçmaz şəhərində, Nəsrəddin Tusi küçəsində yerləşən marketlərin birinin qarşısında baş verib. Mübahisə zəminində 1989-cu il təvəllüdlü Əlipaşa Məmmədov həmyerlisi, 1991-ci il təvəllüdlü Qərib Cəbrayılovu ürək nahiyəsindən bıçaqlayıb.
Yaralı dərhal Xaçmaz Rayon Mərkəzi Xəstəxanasına çatdırılsa da, həkimlərin səylərinə baxmayaraq, onun həyatını xilas etmək mümkün olmayıb.
Hadisədən dərhal sonra saxlanılan Əlipaşa Məmmədov barəsində cinayət işi başlanıb və Sumqayıt Ağır Cinayətlər Məhkəməsinin hökmü ilə o, 17 il müddətinə azadlıqdan məhrum edilib. Təqsirləndirilən şəxs bu hökmdən apellyasiya şikayəti versə də, nəticə dəyişməyib – şikayət təmin olunmayıb.
20-05-2025, 12:39
112
