Vətən uğrunda canını fəda etmiş, Azərbaycanın Milli Qəhrəmanı, general-mayor Polad Həşimovun anası Səmayə ana Qurban Bayramı münasibətilə ziyarət olunub.
Sumqayit.tv xəbər verir ki, ziyarətdə Sumqayıt Şəhər İcra Hakimiyyəti başçısının birinci müavini Teymur Səmədov, şəhər Bələdiyyəsinin sədri Adil Xudadatov, bələdiyyə üzvləri, qazi Vüsal Şahbazov və digər ictimai nümayəndələr iştirak ediblər.

Teymur Səmədov Səmayə ananı bayram münasibətilə təbrik edərək, Sumqayıt İcra Hakimiyyətinin başçısı Zakir Fərəcovun salamlarını çatdırıb. O bildirib ki, şəhid ailələri və qazilər şəhərdə daim diqqət mərkəzində saxlanılır və bu, yalnız rəsmi məsuliyyət deyil, həm də mənəvi borcdur.

Adil Xudadatov da çıxışında vurğulayıb ki, şəhid ailələri ilə bağlı məsələlər bələdiyyə üçün daim prioritetdir. Onun sözlərinə görə, Polad Həşimov kimi qəhrəmanlara ehtiram göstərmək hər bir vətəndaşın vəzifəsidir.

Səmayə ana isə göstərilən diqqətə görə təşəkkürünü bildirib, Prezident İlham Əliyevə və bütün dövlət qurumlarına minnətdarlıq edib. O, oğlunun və digər şəhidlərin canı bahasına qurulan dövlətin sabitliyi üçün daim dua etdiyini deyib.

Bu ziyarət bir daha göstərdi ki, şəhid ailələri cəmiyyətin diqqətindədir, heç vaxt unudulmur. Qəhrəman Polad Həşimovun xatirəsi xalqımızın yaddaşında daim yaşayacaq və gələcək nəsillərə örnək olacaq.