Sumqayit.tv verilən məlumata görə, "Bələdiyyə parkı”nda aparılan yenidənqurma və yaşıllaşdırma tədbirləri şəhər sakinlərinin razılığı ilə qarşılanır.
Sumqayıt şəhərində ictimai məkanların abadlaşdırılması və vətəndaşların keyfiyyətli istirahət imkanlarının genişləndirilməsi məqsədilə Sumqayıt Bələdiyyəsi tərəfindən mühüm tədbirlər görülür. Bu çərçivədə xüsusilə “Bələdiyyə parkı”nda həyata keçirilən işlər diqqət çəkir.
Ötən həftələrdə park ərazisində yaşıllaşdırma işləri aparılmış, ərazinin estetik görünüşünün artırılması istiqamətində ağac və gül kolları əkilmişdi. Hazırda isə parkın daha baxımlı olması üçün yeni mərhələyə start verilib – köhnə bardurlar sökülərək funksional və estetik baxımdan daha dayanıqlı bardurlarla əvəz olunur.
Yeni bardurlar həm gül kollarının, həm də parkın qazon örtüyünün xarici təsirlərdən qorunmasına xidmət edir. Bununla yanaşı, parkın ümumi görüntüsünə nizamlılıq və estetik düzən qazandırır.
Sakinlər parkda aparılan işləri müsbət qiymətləndirir, bələdiyyənin bu cür addımlarını alqışlayır və davamlı olmasını arzulayırlar. Onların fikrincə, yaradılan müasir istirahət mühiti şəhərdə yaşamaqdan zövq almağa imkan verir.
Qeyd edək ki, bu abadlıq tədbirləri yalnız “Bələdiyyə parkı” ilə məhdudlaşmır. Sumqayıt şəhərinin digər park və yaşayış massivlərində də bu il ərzində oxşar yenilənmə işlərinin aparılması nəzərdə tutulur.
Sumqayıt Bələdiyyəsinin atdığı bu addımlar bir daha göstərir ki, şəhər rəhbərliyi vətəndaş rahatlığını, estetik zövqü və ekoloji mühiti daim diqqət mərkəzində saxlayır.
11-06-2025, 18:14
358
