Qərbi Azərbaycan İcmasının (QAİ) Sumqayıt nümayəndəliyində bu qurumun fəaliyyətə başlamasının 2 illiyi münasibətilə geniş tərkibdə iclas keçirilib.
Toplantıda əsasən iki məsələ müzakirəyə çıxarılıb:
Nümayəndəliyin son iki il ərzindəki fəaliyyətinin hesabatı
Təşkilati məsələlər
İclası açan QAİ Sumqayıt nümayəndəsi Ramiz İsmayılov son dövr ərzində görülən işlər barədə ətraflı məlumat verərək, Sumqayıtda Qərbi Azərbaycan məsələsinin təbliği və təşkilatlanma istiqamətində aparılan tədbirləri iştirakçıların diqqətinə çatdırıb.
Tədbirdə çıxış edən Akif Şahbazov gənclərin bu proseslərə daha aktiv şəkildə cəlb olunmasının vacibliyindən danışıb. Alı Alıyev isə ermənilərin tarix boyu azərbaycanlılara qarşı həyata keçirdiyi etnik təmizləmə siyasətini konkret faktlarla xatırladıb.
Professor Aftandil Məmmədov çıxışında Qərbi Azərbaycan mövzusunun həm yerli, həm də beynəlxalq mətbuatda gündəmdə saxlanmasının əhəmiyyətini qeyd edib və bu istiqamətdə maarifləndirici tədbirlərin intensivləşdirilməsinin vacibliyini vurğulayıb.
Digər çıxışçı Sevindik Hüseynov bildirib ki, Qərbi Azərbaycan mövzusu elmi əsaslarla, hüquqi sənədlərlə və tarixi faktlarla dünya ictimaiyyətinə çatdırılmalıdır. O, bu məsələni informasiya müharibəsində mühüm arqument kimi təqdim etməyin vacibliyini qeyd edib.
Tədbirin sonunda iştirakçılar Qərbi Azərbaycan məsələsində birliyin və həmrəyliyin vacibliyini vurğulayaraq, bu istiqamətdə ictimai fəaliyyətin daha da gücləndirilməsi üçün çağırış ediblər.
14-07-2025, 16:25
306
