Sumqayıt şəhərindəki Nəsimi adına Mədəniyyət və İstirahət Parkında sağlam ağacların kəsilməsi barədə yayılan məlumat həqiqətə uyğun deyil.

Sumqayit.tv xəbər verir ki, bu barədə Teleqraf-ın sorğusuna cavab olaraq Sumqayıt Şəhər İcra Hakimiyyətindən bildirilib.

Qeyd olunub ki, park ərazisində yalnız qurumuş ağacların və təhlükə yaradan budaqların kəsilməsi həyata keçirilib.

"Bununla yanaşı, ərazidə abadlıq və təmizlik işləri aparılıb, sakinlərin istirahəti üçün daha rahat şərait yaradılıb. Qeyd olunan işlər ictimaiyyət üçün də açıq olub və bununla bağlı reportaj hazırlanaraq mediada yayımlanıb. Vətəndaşlarımızı dəqiqləşdirilməmiş məlumatlara inanmamağa və rəsmi mənbələrə istinad etməyə çağırırıq", - məlumatda bildirilib.

Qeyd edək ki, sosial mediada Nəsimi adına Mədəniyyət və İstirahət Parkında ağacların kəsilməsi ilə bağlı videolar yayımlanıb. İddialara görə, kəsilən ağacların yerinə yeni attraksionların quraşdırılması nəzərdə tutulub.