Əmlak məsələləri üzrə ekspert Elnur Fərzəliyev mənzil bazarında qiymətlərin gələn ilin əvvəlində 20 faizə qədər bahalaşacağı barədə yayılan məlumatlara münasibət bildirib.

Sumqayit.tv-in məlumatına görə, bunu ekspert Pravda.az-a açıqlamasında deyib ki, mənzil qiymətlərinin artıb-azalmasına heç kimin zəmanət verməsi mümkün deyil:

“Bazarı bilmək olmur. Qiymətlər stabilləşə də bilər, arta da. Bu, ümumi regionda və dünyada baş verən proseslərlə bağlıdır. Hansısa fors-major hadisə baş verə bilər, qiymətlər tamamilə ucuzlaşar”.



Elnur Fərzəliyevin sözlərinə görə, son illər Bakıda söküntülər səbəbindən mənzilə tələbat artıb, bu isə qiymətlərin bahalaşmasına gətirib çıxarır. Maraqlıdır ki, ekspert təkcə paytaxtı yox, Sumqayıtı da bu prosesdən kənarda görmür.

Onun sözlərinə görə, artıq Sumqayıt və digər böyük şəhərlərdə yeni çoxmənzilli yaşayış binaları inşa etmək üçün torpaq sahələri qalmayıb. Buna görə tikinti şirkətləri müəssisə və yaşayış massivlərini alaraq orada tikinti aparmağa çalışır.

Bu isə həm torpağın, həm də tikintinin maya dəyərinin artmasına səbəb olur ki, nəticədə Sumqayıtda mənzillərin qiymətləri də yüksəlir.

Ekspert əlavə edib ki, yaxın illərdə söküntülərin genişlənməsi və kompensasiya alan vətəndaşların bazara dönməsi qiymət artımını daha da sürətləndirə bilər.