Azərbaycanda sənaye zonalarında məhsul istehsalı son on ildə rekord həddə çatıb.
Belə ki, əgər 2015-ci ildə bu rəqəm 271 milyon manat olubsa, 2025-ci ilin ilk yarısında göstərici 17,2 milyard manata yüksəlib.

Sumqayit.tv xəbər verir ki, İqtisadiyyat Nazirliyi yanında İqtisadi Zonaların İnkişafı Agentliyindən verilən məlumata görə, ölkənin sənaye zonalarında ilk məhsul istehsalı məhz 2015-ci ildə Sumqayıt Kimya Sənaye Parkında həyata keçirilib. O vaxtdan bəri Sumqayıt Azərbaycanın sənaye xəritəsində strateji mövqeyini möhkəmləndirib və qeyri-neft sektorunun inkişafında aparıcı rola malikdir.

Burada istehsal olunan məhsullar artıq 70-dən çox ölkəyə ixrac olunur. Əsas bazarlara Avropa, Asiya, MDB ölkələri, Türkiyə, həmçinin Şimali və Cənubi Amerika daxildir.

Sumqayıt sənaye müəssisələrinin istehsal portfelinə polad, polimer borular, tikinti kimyəviləri, sürtgü yağları, kabel, şüşə lövhələr, keramik plitələr, tütün məmulatları, ipliklər, elektrodlar, ayaqqabılar və digər məhsullar daxildir.

Rəsmi məlumata əsasən, bu ilin ilk yarısında sənaye zonalarından 583 milyon manatlıq ixrac həyata keçirilib ki, bu da 2024-cü ilin eyni dövrü ilə müqayisədə 22,2 % çoxdur. Qeyri-neft ixracında isə pay 28,3 % təşkil edir