Sumqayıt-Bakı avtomobil yolunda qanunsuz sərnişin daşımaları ilə bağlı reyd keçirilib.
Sumqayit.tv xəbər verir ki, Azərbaycan Yerüstü Nəqliyyat Agentliyi (AYNA) və Baş Dövlət Yol Polisi İdarəsinin əməkdaşlarının birgə təşkil etdiyi tədbir zamanı qanunvericiliyin tələblərinə uyğun icazəsi olmayan 18 nəqliyyat vasitəsi saxlanılıb.

Saxlanılan sürücülər barəsində İnzibati Xətalar Məcəlləsinin 322-ci maddəsinə (avtomobil nəqliyyatı ilə sərnişin daşınması qaydalarının pozulması) əsasən inzibati protokollar tərtib olunub.

Son günlər xüsusilə Xırdalan, Masazır, Müşfiqabad və Saray istiqamətindən Sumqayıt-Bakı yolunda icazəsiz sərnişindaşıma hallarının artdığı qeyd olunur. AYNA rəsmiləri bildiriblər ki, belə daşımalarda iştirak edən şəxslər nəinki inzibati məsuliyyət daşıyır, həm də sərnişinlərin təhlükəsizliyini risk altına qoyurlar.

Qurumun məlumatına görə, reydlər mütəmadi olaraq davam etdiriləcək.