Fevralın 23-də Sumqayıt şəhər Ağsaqqallar Şurasının növbəti iclası keçirilib. Toplantıda 2025-ci ilin yekunları təhlil olunub, eyni zamanda 2026-cı il üçün qarşıda duran vəzifələr geniş müzakirə edilib. İclasda şəhər rəhbərliyinin nümayəndələri, Şura sədrliyi, müavinlər, təftiş komissiyasının üzvləri, eləcə də müxtəlif idarə, müəssisə və təşkilatların təmsilçiləri iştirak ediblər.

Tədbiri giriş sözü ilə açan Şuranın sədri Tabrik Quliyev görülmüş işlər barədə hesabat məruzəsi ilə çıxış edib. Məruzədə ötən il ərzində şəhərin sosial-iqtisadi və humanitar sahələrində əldə olunan nəticələr diqqətə çatdırılıb, həyata keçirilən infrastruktur layihələrinin Sumqayıtın inkişafına mühüm töhfə verdiyi vurğulanıb.

Qeyd olunub ki, “Konstitusiya və Suverenlik İli” çərçivəsində şəhərdə genişmiqyaslı abadlıq və quruculuq işləri aparılıb, yaşayış binalarının dam örtükləri yenilənib, lift sistemləri müasir standartlara uyğun şəkildə yenidən qurulub. Bununla yanaşı, “Acıdərə” kanalının boruya alınması və təmizləyici qurğunun tikintisinin başa çatdırılması istiqamətində işlər davam etdirilib, məişət tullantılarının emalı ilə bağlı mühüm addımlar atılıb.

Çıxış edənlər bildiriblər ki, şəhərdə bütün sahələr üzrə dinamik inkişaf müşahidə olunur. Xüsusilə yaşıllıq zonalarının genişləndirilməsi, yolların və digər infrastrukturun yenilənməsi şəhər rəhbərliyinin əsas diqqət mərkəzində saxlanılıb. Təkcə ötən il ərzində yaşıllıq əraziləri 6 min kvadratmetr artırılıb, ümumilikdə isə şəhərin yaşıllıq sahəsi 11 min hektara çatdırılıb. Nəticədə Sumqayıtda adambaşına düşən yaşıllıq sahəsi 27,2 kvadratmetr təşkil edir ki, bu da respublika üzrə ən yüksək göstəricilərdən hesab olunur.

İclasda 2026-cı ildə bu istiqamətdə işlərin daha da genişləndirilməsi, yeni yaşayış massivlərində abad məhəllələrin salınması və sosial infrastruktur layihələrinin davam etdirilməsi planlaşdırıldığı bildirilib. Ağsaqqalların şəhərin ictimai-siyasi həyatındakı rolunun artırılması, gənclərlə işin gücləndirilməsi və xüsusilə narkomaniyaya qarşı mübarizə tədbirlərinin genişləndirilməsi əsas prioritetlər kimi müəyyənləşdirilib.

Toplantıda Azərbaycan dövlətinin ağsaqqal institutuna göstərdiyi diqqət və qayğı xüsusi vurğulanıb. Bildirilib ki, ümummilli lider Heydər Əliyev tərəfindən əsası qoyulan bu ənənə bu gün də uğurla davam etdirilir və ölkə başçısı İlham Əliyev tərəfindən daim diqqət mərkəzində saxlanılır.

Çıxış edən Şura üzvləri respublikada, o cümlədən Sumqayıtda həyata keçirilən abadlıq və quruculuq işlərini yüksək qiymətləndirərək, şəhərin inkişafına göstərilən davamlı dəstəyə görə minnətdarlıqlarını ifadə ediblər.

İclasın sonunda qarşıdakı dövr üçün fəaliyyət proqramı qəbul olunub, Ağsaqqallar Şurasının yerli səviyyədə maarifləndirici və sosial təşəbbüslərinin daha da gücləndirilməsi barədə qərarlar verilib.

25-02-2026, 20:01 166